LLG-2-41 Screeuyn gys John Kewley 3

28.VI.07.

My charrey deyr, ta mee feer wooisal diu son yn gioot ta shiu er choyrt dou. Ta mee geearree dy ve booisal da Jee son e vyghin as e hurranse-foddey as ooilley bannaghtyn yn vea shoh. Cha vel mee screeu monney nish, Gaelg ny Baarle, son ta my laue craa ny cheayrtyn as cha vel mee son screeu. Cha vel mee gennaght aslayntys erbee agh rheumatism, ta mennick lhiettal mee voish rouail myr ta mee geearree.

Ta mee faagit ny lomarcan jiu. Ta my vac ersooyl marish brigad ny guillyn er gys oirr yn cheayn as s’arryltagh va mish er goll maroo dy akin yn keayn keayrt elley. Ta red gollrish margey er ve ayns shoh rish laghyn, as ta ymmodee sleih voish ny baljyn beggey mygeayrt er ve geiyrt er yn ommijys oc. Cha vel eh jannoo cosney da veg jeh’n sleih ayns shoh agh da fer yn thie-oast, as ren yn fliaghey çheet noi oc son t’eh er ve fliugh as feayr slane yn vee, as cha row Mee Voaldyn monney share.

Cha vel naight noa erbee aym dy insh diu agh dy vel my inneen as e mec ooilley er gheddyn obbyr ayns Canada as jannoo mie. Ta mee geearree dy jean shiu cooinaghtyn mee gys Fer-lhee Clague tra nee shiu meeiteil eh; cha vel fer erbee elley ta mee smooinaght briaght mychione aym.

Nish çhyndaa booise diu son yn gioot shoh reesht, ta mee cur jerrey er yn screeuyn as tannaghtyn nyn shirveishagh arryltagh,

Edward Faragher