Clilstore Facebook WA Linkedin Email
Login

This is a Clilstore unit. You can link all words to dictionaries.

LLG-2-15. Skeeal mysh mac eirinnagh

Ta mee er chlashtyn my ayr ginsh mychione mac eirinnagh; v’eh yn ynrycan lhiannoo as v’eh ny vac stroialtagh. Veagh eh dy mennick rouail voish yn thie as va’n ayr echey feer fargagh rish as freayll yn argid voish, agh va’n voir echey dellal rish lesh meenid as cur paart dy argid da ny cheayrtyn gyn-yss da’n ayr. As tra veagh eh geddyn argid veagh eh goll gys balley va ghaa ny three dy veeillaghyn voish yn ynnyd-vaghee echey as fuirraght ayns shen gys veagh yn argid baarit.

Va un cheayrt as ren e voir gobbal dy chur argid da, er yn oyr nagh row eh cooilleeney e yialdyn agh stroie ooilley myr v’eh geddyn eh, as v’eh son laghyn goll mygeayrt yn thie; cha row fys echey cre’n aght dy gheddyn eh. Ren eh girree feer voghey un laa as hie eh roish gys yn valley. As va seyr-thieyn ayns yn valley veagh jannoo yn obbyr seyr da e ayr. Haink eh gys thie yn seyr, as va yindys er yn seyr dy row eh ayns yn valley cha moghey. Vrie yn seyr jeh row red erbee er haghyrt da tra v’eh cha groamagh. V’eh er choayl moir vie, dooyrt eshyn. 

“Vel dty voir marroo?” dooyrt yn seyr.

“Ta,” dooyrt eh, “as ta mee er chur lesh towshan dy yannoo covin jee.”

Dooyrt eh dy row ee dy ve oanluckit laa-ny-vairagh as va’n aigney echey cha boirit, dooyrt eh, v’eh er yarrood cur lesh argid marish dy gheddyn reddyn son yn oanluckey. Agh dooyrt yn seyr dy jinnagh eshyn eeasaght paart da. Dooyrt eh dy row eh thurn mie as dy row eh booisal nagh row eh eginit dy gholl thie reesht. Myr shen ren yn seyr cur daa phunt jeig da. Eisht hie eh roish dy iu marish e chumraagyn.

Tra va’n covin aarloo hie yn seyr as yn prindeys thie lesh, as tra haink ad gys thie yn eirinnagh va’n ven ny hassoo ec yn dorrys.

“Cre’n boayl ta shiu goll lesh yn covin aalin?” dooyrt ish. As tra honnick yn seyr ee v’eh feer agglit, agh ny-yeih ren eh roie as ginsh jee ooilley mygeayrt-y-mysh. Dooyrt ee rish gyn gra veg jeh rish e ayr, as ren ee geeck yn argid da as ren eh cur lesh yn covin thie marish reesht. Agh va’n dooinney aeg goll mygeayrt ayns yn valley gys va’n argid ooilley ersooyl, as va aggle er dy gholl thie kyndagh rish ny v’eh er yannoo, as v’eh shooyl mygeayrt fegooish ping ayns e phoshag.

Agh un voghrey ren eh meeiteil sheshaght dy Yernee va er ve buinn arroo da eirinnagh, as va’n meailley¹ goit oc as v’ad shooyl son obbyr. Dooyrt eh roo dy jinnagh eshyn obbyr daue as dy beagh ad ooilley goll dy lhie ayns yn un shamyr ec yn oie, as dy row eh ny share daue my va argid oc dy chur da gys veagh yn buinn echeysyn jeant, er aggle dy jinnagh ad geid er y cheilley as dy jinnagh eh cur sheese ayns lioar quoid va dagh fer coyrt da. Myr shen v’ad streeu quoi yinnagh geddyn yn argid currit da hoshiaght. 

Tra va’n argid ooilley echey, dooyrt eh roo goll dy gheddyn jinnair ec thie-oast ayns yn valley. Eisht hie eh maroo gys magher mooar va er-gerrey da’n valley, agh cha row yn arroo creen dy liooar, agh ren eh cur ad gys obbyr. Dooyrt eh dy row eshyn goll gys yn thie-oast dy oardrail jinnair daue, as hie eh roish. Cha row ad feer foddey ec obbyr gys honnick yn eirinnagh ad buinn ayns yn vagher, as ren eh çhaglym ny nabooyn as ren ad geiyrt ooilley ersooyl.

Hie ad eisht gys yn thie-oast dy yeeaghyn son yn dooinney ren cur ad gys obbyr, agh cha row eh ry gheddyn. Myr shen ren ad goll jees as jees ayns sheshaght dy yeeaghyn er e hon. Fey-yerrey ren jees jeu meeiteil rish, as dooyrt ad rish cur yn argid oc daue.

“Quoid dy argid ren shiu cur dou?” dooyrt eshyn. Dooyrt ad wheesh shoh. Ren eh jeeaghyn ayns yn lioar.

“Ta shen kiart,” dooyrt eh. 

Ren eh fakin arreyder ayns yn traid as dooyrt eh rish yn arreyder dy ghoaill kiarail jeh ny deiney shoh choud as veagh eh geddyn e chumraag dy chur enney orroo, as hooar eh ersooyl reesht. Tra va’n argid shen stroit echey v’eh naaragh dy gholl thie, as ren eh failley son fer-moonjer da eirinnagh. As tra v’eh ayns shen v’eh hene as yn çharvaant tuittym magh as cha jinnagh ee jannoo yn lhiabbee da. 

V’eh un laa ayns magher traaue, as haink yn mainshter dy chur shilley er. Eisht ren eh faagail ny cabbil as goll lesh yn thie. Vrie yn mainshter jeh cre’n boayl v’eh goll.

“Goll thie dy yannoo yn lhiabbee,” dooyrt eh. 

“Gow gys dty obbyr,” dooyrt yn mainshter, “as verrym’s orroo jannoo yn lhiabbee dhyt.” 

Myr shen ren yn mainshter cur urree jannoo yn lhiabbee da yn oie shen, agh ren ee cur conney-aittin fo’n carmeish, as ren ny jilg goll ayns e ghreeym tra ren eh lhie sheese. Ren eh glenney yn lhiabbee, agh cha dooyrt eh veg mygeayrt-y-mysh.

Lurg tammylt dy hraa va giense ec ny fir-vooinjer as ny sharvaantyn ayns yn nabooys keayrt ’sy vlein, as veagh ad çhaglym voish foddey as gerrid. Tra haink oie yn giense hie yn çharvaant gys yn giense marish yn chooid elley jeu, agh ren eshyn fuirraght ec y thie. T’eh jeeaghyn dy re Oie Voaldyn va oie yn giense as va’n earish feer aalin. Myr shen va’n çharvaant fud ny hoie ec yn giense daunsin, as tra haink ee thie moghrey laa-ny-vairagh v’ee feer tooillit as cadlagh.

Va’n fer-mooinjer gobbragh ayns magher rish lhiattee yn raad vooar, as ren yn venainshter cur yn çharvaant dy niee paart dy sick ec spooyt va ec cleigh yn raad vooar. As myr v’ee er e glioonyn ec yn spooyt, as yn ghrian soilshean feer çheh, ren ee tuittym ny cadley. Va’n fer-mooinjer ceau e hooill urree, as tra honnick eh dy row ee ny cadley haink eh harrish ayns yn raad, as hrog eh ny hoanraghyn eck seose harrish e kione, as daag eh ee myr shen as yn thoin eck rooisht. Ayns traa gerrid haink Yernagh er yn raad, fer va çhaglym oohyn, as va cabbyl beg echey, as daa vurlin dy oohyn er e ghreeym. 

Tra honnick yn cabbyl yn thoin rooisht eck cha jinnagh eh goll shaghey, as ren yn Yernagh cur yn kip da. Cha row yn Yernagh fakin ny va’n cabbyl ayns aggle roish, as va’n cabbyl sprettal as lheimyragh gys ren eh ceau ny murleeyn oohyn er y thalloo. Eisht haghyr da’n Yernagh fakin ee, as ghow eh yn kip as ren eh yeealley ee er y thoin gys v’ee geamagh myr mynjeig ghoair. As va’n fer-moonjer ny hassoo jeeaghyn orroo. Myr shen hooar eh cooilleeney urree son cur yn conney-aittin fo’n carmeish da. 

Traa gerrid ny lurg shen hooar yn ayr echey baase as ren e voir coyrlagh eh dy heet thie reesht. As ren eh goll thie as laboragh ayns yn stayd-hallooin echey hene lurg da v’er ynsagh creenaght liorish e ommijys, as v’eh grait dy row eh ny ghooinney mie ny lurg shen as jannoo myr deiney elley.

Ta’n earish cha fliugh as stermagh ayns shoh. Cha vel caa ec peiagh dy screeu son cha vel monney reamys ayns y cabbane, as t’eh ro gheayagh dy hoie er deck. Cha vel fys aym cre’n traa hig earish share as brick mygeayrt. 

E Faragher, Osprey², Purt le Moirrey, Crookhaven, Co Cork, Nerin.

Clilstore Gaelg Ard

Short url:   https://clilstore.eu/cs/9326