Clilstore Facebook WA Linkedin Email
Login

This is a Clilstore unit. You can link all words to dictionaries.

LLG-1-08 Coyrle da Manninee

Ny vud ocsyn t’eh yn currym ain dy ghoaill rish dy vel shin kianlt ayns ymmodee booise daue, son yn aigney mie as yn chummal seose oc, ta shin ayns yn pabyr shoh, ta er ny yannoo ny smoo, ayns aght er-lheh goaill stiagh nyn vud lheid as ta Manninee dooie, jeh sluight ooasle Mannanan Mac Lear. Ny whail ocsyn ta shin dy kinjagh er n’yeeaghyn, ayns yn streeu ain dy chummal seose ny privilegeyn çhymnit dooin liorish ny shenn ayraghyn ain. Shassoo shickyr ayns yn chiarail ain dy chummal seose cairyssyn ny çheer ain, as ayns rooteil seose ny mee-chairyssyn ta er choyrt ayns danjeyr çhiamble casherick yn constitution ain, liorish fir-oik goaill orroo dy reih ad hene, as goaill yn oik er mainshtyraght, ayns ynnyd ad ve reiht liorish cummaltee yn ellan, as ve currit ayns yn oik lioroosyn, dy hassoo seose er nyn son as dy yannoo cairys ayns nyn ynnyd, ta shin ec dy chooilley hraa er choyrt nyn dreisht er cummaltee yn çheer ain hene.

Ta shin er n’gholl er nyn doshiaght myr deiney caggee noi noidyn yn ellan; ta shin er neginagh ad dy ghoaill rish dy vel ny hobbraghyn oc lheid as nagh vod ve er ny hurranse liorish yn çheeloghe shoh; ta shin er cheau foshlit dorrys yn çhiamble dyn-yss, as er neginagh ad dy choyrt clashtyn da, as dy ockley magh ny haccanyn ain. Agh cha vel shin foast er ve abyl dy choyrt fo chosh dy chooilley hranlaasagh ta freayll shin voish feddyn slane reamys; cha vel shin foast er ve abyl dy choyrt mow dagh drogh chliaghtey ta er nirree seose voish traa dys traa ny mast’ain, lheid as veagh ayrn erbee jeh reeriaght Hocsyn ayns nearey roish, as lheid as nagh jinnagh eash erbee, agh ny heashyn s’dorraghey, y choyrt biallys daue.

Ta’n cooney ta’n laboragh ain er n’gheddyn voish cloan Mannanan Mac Lear, ga nagh vel ad foast er ve feer vondeishagh, feeu jeh nyn mooise share—agh ta shin ginsh dy foshlit da ny fir-çheerey ain, dy re liorish cummal magh ny lomarcan ta’n varriaght dy ve ry gheddyn. Accanyn ny shenn ayraghyn ain, as ynrickys ashoon Hocsyn ayn va ny leeideilee dy hroailt ayns yn toilshey er nyn doshiaght.

Ta’n chooish ain mie as troggit er undin shickyr, cha nee er undin neu-fondagh; she dy charraghey, cha nee dy choyrt mow, Kiare-as-Feed yn çheer ain ta shin streeu. As ta shin geearree er cummaltee Ellan Vannin dyn gaase skee ayns jannoo dy mie, son ga nagh vel eh ayns pooar cretooryn ny lomarcan dy phointeil daue hene leagh nyn laboragh, lhig daue cooinaghtyn er dy vel ny smoo ayns yn pooar ock—tar ad abyl toilçhin eh.

[Mona’s Herald 06.02.1835]

Clilstore Gaelg Ard

Short url:   https://clilstore.eu/cs/8667