Clilstore Facebook WA Linkedin Email
Login

This is a Clilstore unit. You can link all words to dictionaries.

LLG-2-09 Toshiagh-jioarey as y Caashey

Ta mish er chlashtyn Boy Ruy Willy Kency ginsh mygeayrt sloop veg va currit er ny creggyn ec yn Traie Vane. V’ee lughtit dy chaashey, as va ooilley yn sleih tayrn caashey gys ny thieyn oc hene as follagh eh gys va slane lught yn sloop ersooyl, paart ersooyl lesh yn cheayn, as yn chooid elley currit lesh ec yn sleih mygeayrt, as paart jeu voish skeeraghyn elley. Myr shen va’n caashey ooilley goit.

Ny lurg shen ren mainshter yn sloop goaill ass laue dy choyrt bing orroo dy voddagh eh geddyn magh quoi ren geid yn caashey. Va ymmodee sleih sumnit gys yn ving, as va turneyr ny jees ayn marish y toshiagh-jioarey. Cha row veg jeh ny turneyryn ny deiney-bingey toiggal Gaelg, agh va’n toshiagh-jioarey son loayrt ee dy mie. As va eshyn reiht dy phrowal ny deiney.

Myr shen v’eh gyllagh ad fer lurg fer cordail rish nyn ennym, as myr v’ad çheet gys yn lioar, v’eh gra roo eh hene, “Va paart euish jeh, as va paart aym’s jeh, as cha row unnane jin follym1.” V’eh gra shoh roo ayns Gaelg.

Eisht v’eh gra roo ayns Baarle, “Kiss the book ye dog ye, pack away ye rogue ye.”

Myr shen cha row dooinney erbee eginit dy ghoaill y loo liorish keeall yn toshiagh-jioarey. V’ad ooilley er ny heyrey as cha row unnane goit dy ve maarlee. Ren yn Ghaelg prowal feer vie ec yn traa shen dy follagh ny maarlee. Agh ayns ny laghyn t’ayn nish cha vel toshiagh-jioarey hene son taggloo Gaelg dy heyrey ny kyndee as dy hauail ny maarlee. V’eh jeeaghyn dy row yn toshiagh-jioarey shen son geid caashey marish yn chooid elley jeh’n sleih, as ren eh geddyn magh yn crout shen son dy hauail eh hene marish yn sleih elley.

Ta paart dy sleih feer chroutagh er ve ayns yn seihll roish nish. Ny-yeih ta mish smooinaght dy vel ny shlee mitçhoor ayns yn seihll ec y traa t’ayn na va rieau ayn roie. Ta’n sleih geddyn lane ynsagh nish. Ny-yeih cha vel ad monney share ayns nyn mea. Va ymmodee jeh’n çhenn sleih feer oney, as va paart dy gheiney ayn rish my vea hene nagh jinnagh assee da lhiannoo.

1 cha row unnane jin follym - ‘there’s not one of us without it [lit. empty]’ Broderick (1982b: 138)

Clilstore Gaelg Ard

Short url:   https://clilstore.eu/cs/8661