Clilstore Facebook WA Linkedin Email
Login

This is a Clilstore unit. You can link all words to dictionaries.

LLG-1-06 Pleadeilys 2

Pleadeilys eddyr daa Vanninagh dooie.

(Juan as Illiam meeiteil.)

Illiam.—Wahll Yuan, kys t’ou goll er bwo? Vel oo rey rish y Heral? Vel oo er lhaih ny naightyn noa bentyn da’n Chiare-as-Feed?

Juan.—Cre ny naightyn t’ou meanal? Cha vel mish er vakin nhee erbee noa ayn edyr, ga dy vel y pobble geearree dy beagh reamys oc reih yn Chiare-as-Feed. Dys shen t’eh ooilley çheet er-lhiam’s—c’red elley?

I.—Oh ta ny smoo na shen. Tar ad nish taggloo jeh jannoo accan, cha nee da’n Ree, agh da’n Chiare-as-Feed ad hene, dy yannoo leigh dy bee ad maghey shoh reiht liorish sleih ny çheerey, as cha nee lioroo hene.

J.—Ta’n irrin ayd. Yarrood mish.

I.—Ogh ghooinney, shoh eer bree as smuir y chooish. Ta mish shickyr jeh nagh vel un er hene jeh’n Chiare-as-Feed nagh jinnagh sideal lhien ’sy chooish, dy jinnagh shinyn agh jannoo nyn aghin huc hene hoshiaght, geearree ad dy yannoo leigh ad ve reiht ass y noa, er-nonney ad ve reiht liorish slane consent y çheer trooid-magh ny skeeraghyn. Son instans, fer son dagh skeerey as y chooid elley son ny baljyn-margee. Cre t’ou gra rish shen?

J.—Dy jarroo shynney lhiam’s mie yn resoon ayd; as ta mee dy jarroo credjal nagh vel wan oc nagh jinnagh1 nyn laue dys y leigh, as myr shen settlal y chooish ec slap.

I.—Boy veen cre’n yllagh veagh trooid yn ellan, scoltagh ad ny creggyn faggys lesh eam. Boy lah, cre’n boggey vees orrin y laa shen!

J.—Ta mish dy slane jerkal rish y laa shen, Illiam; as son yn oyr shoh. Inshym’s dhyt red foddee nagh row fys ayd’s er roie. Ta’n chooid smoo jeh’n Chiare-as-Feed er e hon. Tar ad slane kiarit, ta mish toiggal, dy yannoo soiagh jeh accan huc liorish y theay, as gialdyn feaysley.

I.—My t’eh dy feer myr shen, Yuan, cha voddagh Manninee red s’doaieagh y yannoo na çheet er nyn doshiaght, as cur y chied çhionse daue, as eisht heeagh sleih cre’n aght harragh ad er.

J.—Veagh eh foddey sloo dy hrubbyl, as çheu-mooie jeh shen, veagh eh ny s’easal y yannoo, as ooilley çheu-sthie jin hene. Veagh Manninee goll lesh y cheilley dys yn obbyr, as cha nee roostey nyn dhoin dys joarreeyn, as ginsh daue ayns Sostyn nagh voddagh shin jannoo n’egooish oc. Ayns Mannin veg veen ’sy traa t’ayn cha vel keesh orrin agh lheid as ta shin goaill soylley jeh. Ta keeshyn er ny queeylyn—wahll, ta raaidyn mie ain; ta keeshyn er ny moddee—wahll, ta droghadyn noa jeant; ta keeshyn er ny thieyn oast—as cooid lhisagh ve, son tar ad jannoo wite assee liorish miolagh shenn vlebbinyn as scollagyn litçheragh dy iu, as dy chur mow nyn saaseyn beaghee. Nish ta ooilley ny keeshyn shoh currit magh er ny raaidyn ain, as ta shin sauail liorish; son ta ny queeylyn, as ny cartyn, as ny greienyn, as ny crouyn cabbil ain ceau foddey sodjey dooin.

I.—Ta ghooinney; as lurg ooilley, she yn Kiare-as-Feed ren y leigh hug ny keeshyn shoh orrin.

J.—Dy beagh lesh shen, dy beagh ad er n’yannoo dy chooilley nhee ren ad chammah’s shen, cha row oyr son plaiynt.

I.—Wahll, wahll, hee main. Lhig daue ve reiht liorish y theay, as eisht—

J.—She, as eisht bee yn sleih cooilleenit. As my hig accan my raad’s laccal signal, verrym’s my laue huggey.

I.—Verrym neesht. Oie vie, Juan.

J.—Oie vie ayd, Illiam.

[Monas Herald 21.02.1834]


1 nagh jinnagh - The conditional of jannoo is commonly used as the conditional of cur / coyrt, so here and in 1.9 and my yinnagh shiu my-ner and 2.30 nagh jinnagh yn foawr enney er. An explanation is given in Broderick 1982a: 117. However, verragh occurs in 1.3 whilleen shilley as verragh nyn dappey voin and in derrin in 1.10 dy derrin’s hood screeuyn ayns Gaelg.

Clilstore Gaelg Ard

Short url:   https://clilstore.eu/cs/8658