LLG-2-07 Deiney kione-lajeragh ec yn eeastagh

Va paart jeh ny eeasteyryn feer chione-lajeragh. Va mish shiaulley marish mainshter keayrt dy row as va daa ghooinney jeh’n çheshaght er yn un laue, as va’n mainshter goaill yn choyrle oc ayns dy chooilley red, as v’ad myr ny Ishmaeliteyn: veagh ad noi dy chooilley red veagh ny deiney elley laccal jannoo as cha row ad feer tushtagh veg smoo na deiney elley.

Ren shin cuirr yn lieen un fastyr aalin as kiune, agh va’n aer jeeaghyn quaagh, ginsh dy row geay as fliaghey er-gerrey. Tra va’n oie er jeet, ren shin prowal yn lieen as va tree cheead ayns yn piyr, as ren shin ceau ee ayn reesht dy lhiggey daue thooilley. Kione tammylt dy hraa ren shin prowal reesht as hug shin mysh meaish assjee, as ren shin ceau ee ayn reesht. Ren shin prowal ayns traa gerrid as v’ee lane reesht, as va’n lieen ny lhie er yn ghrunt lane scaddan.

Dooyrt mee hene roo dy row eh traa dooin cur er boayrd, agh dooyrt yn daa ghooinney shoh dy row eh traa dy liooar. Va’n gheay goaill niart as va builley¹ er yn eayst as v’eh traa dooin cur er boayrd, mannagh row veg dy scaddan aynjee. Va mee brasnagh ad dy chur er boayrd; ooilley yn traa va’n mainshter er ve booiagh dy liooar dy chur er boayrd, agh cha jinnagh eh gra veg noi’n daa ghooinney shoh. Ec yn jerrey ren fer jeu briaght jeem nee agglagh va mee dy beagh rour aynjee.

“She,” dooyrt mee.

“Cha ren mee rieau fakin rour foast,” dooyrt eh.

As ec yn jerrey ren yn mainshter goaill my choyrle, as ghow shin toshiaght dy chur er boayrd, as va wheesh dy scaddan aynjee, nagh row shin abyl geddyn ee er boayrd. Hooar shin paart jee goit er boayrd, as dooyrt fer jeh ny deiney shoh, “Vel saase erbee dy gheddyn yn scaddan ass dy cheau ayn ee tammylt elley?” Agh dooyrt yn mainshter dy row ee ayn foddey dy liooar. Myr shen va shin tayrn ee er boayrd cha tappee as oddagh shin, as ren yn lieen çheet seose gys mullagh yn ushtey as v’eh lane scaddan. Cha row veg ry akin agh scaddan.

Tra hooar shin kiare ny queig dy pheeshyn stiagh, haink baatey-shiaullee goll er son yn purt as ren ee goll trooid yn lieen ain as brishey eh. Myr shen cha dooar shin arragh, agh va’n gheay sheidey dy tappee. Ren shin cur yn croan er mullagh e ching as troggal shiaull agh ren yn baatey cur y jerrey fo’n ushtey daa cheayrt. Jus v’ee aarloo dy gholl sheese, agh ren yn mainshter cummal ee roish yn gheay as roie stiagh lesh yn traie son dy hauail nyn mioys. Agh roish ren shin roshtyn yn traie hooar shin yn ushtey currit magh, as va shin cur magh ushtey ooilley yn raad gys yn purt.

Hooar shin stiagh ayns purt Howth ayns Nerin ec brishey yn laa moghrey Jesarn as va daa ayrn jeh’n lieen ain caillit. Va mysh keead meaish dy scaddan ain. Haink lheid yn sterrym gys nagh dooar shin yn scaddan assjee gys yn oie laa-ny-vairagh, va wheesh dy scaddan ayns yn lieen ain as va er lughtagh three baatyn dy beagh shin er chur er boayrd ayns traa. Va palçhey scaddan er ve ain as yn lieen neesht agh cha jinnagh ad goaill coyrle, as va ny smoo dy choayl ain na v’ain dy chosney. Myr shen ta shin fakin nagh vel eh mie dy ve sayntoilagh.

Ta mee er ve marish deiney as v’ad er choyrt wheesh dy scaddan ayns baatey gys v’ee er gholl sheese. Honnick mee unnane goll sheese un voghrey as cha row monney geay ayn, agh ren ad cur wheesh dy scaddan er boayrd gys ren yn keayn çheet aynjee as cha voddagh ad geddyn eh assjee. Myr shen ren ad ooilley goll ayns yn baatey beg as hie ee sheese ayns traa feer gherrid ny lurg shen. Parick Noo voish Purt ny Hinshey va’n ennym eck as va keayn ooilagh goll sheear lesh yn Cholloo son shiaght ny hoght dy hiaghteeyn ny lurg shen, as cha vel thammag dy scaddan er jeet er yn choorse shen rieau er dy henney, boayl va shin cliaghtey geddyn eeasteeyn mie. Ta mee er ve marish deiney as myr veagh shin shiaulley ayns yn oie dy akin scaddan ayns yn ushtey tra veagh shin çheet ayns thammag, veagh ad goll er finnue as roie mygeayrt gollrish reddyn keoi. Ta mee er vakin shin coayl lesh ve ayns rour siyr as keayrtyn lesh rour lhiggey shaghey. T’eh yn aght share goaill ny reddyn ayns yn aght meanagh gyn rour siyr ny rour lhiggey shaghey.

Ren mee fakin ayns pabyr dy ren shiu geddyn er feer vie lesh yn Ghaelg ec Doolish, as ta mee jerkal dy jean ny Manninee streeu dy gheddyn çhengey ny mayrey Ellan Vannin seose reesht. T’eh jeeaghyn dou dy vel yn sleih mygeayrt yn Owe² goaill paart dy haitnys ayns yn Ghaelg. Va fer jeh ny deiney haink ayns yn steamer riyr ginsh dou dy row eh er chur lesh lioar dy arraneyn spyrrydoil Gaelgagh marish, as v’eh streeu dy lhaih ee. Dy jinnagh ooilley ny Manninee goaill taitnys ayns lhaih Gaelg yinnagh ad jannoo dy mie.