Cuairt Uachtarán na hÉireann ar Shasana

Cainteoirí: Áine Ní Chuirreáin (RnaG); Áine Ní Bhreisleáin (RnaG)

ÁNC:  Ar an tríú lá de chuairt stáit na Breataine tabharfaidh an tUachtarán Micheál D Ó hUiginn agus a bhean chéile, Sabina, cuairt ar Oxford agus, níos moille inniu fillfidh siad ar chaisleán Windsor áit a mbeidh fáiltiú, ach atá dírithe ar Thuaisceart Éireann de réir mar a thuigim agus gach a bhaineann leis an réigiún sin a reáchtáil.  Ach go díreach tá Áine Ní Bhreisleáin ó Nuacht RTÉ i Londain ó bhí Dé Luain ann agus tá sí liom anois ar líne teileafóin. Dia dhuit a Áine.

ÁNB:  Dia is Muire duit a Áine.

ÁNC:  Bhuel, inis seo dom. Bhí tú thall agus tá tú thall ó bhí Dé Luain ann. Cad é na buaicphointí, do bharúil, go dtí seo?

ÁNB:  Bhuel bhí cuid mhór de na himeachtaí ag tarlú amuigh thart faoi chaisleán Windsor an chéad lá den turas, sin, Dé Luain agus Dé Máirt.  Bhí an fháiltiú mhór ríoga sin amuigh caisleán Windsor le na beithígh ar fad agus na saighdiúirí nuair a bhuail an tUachtarán agus Sabina Higgins leis an Bhanríon agus an Prionsa Philip.  Bhí mé féin i láthair ag an ócáid i mainistir Westminster, áit a raibh an, áit a raibh an Bhanríon, áit a raibh an tUachtarán gabh mo leithscéal, ag leagan bláthfhleasc (1:00) ar thuamba, an tsaighdiúra anaithnid, agus áit ar umhlaigh sé ar feadh bomaite ag leacht cuimhneacháin don Iarla Mountbatten ar ndóigh a maraíodh i Sligeach i naoi gcéad déag seachtó is a naoi.  Ceann de na buaicphointí eile ar ndóigh nuair a, nuair a bhuail sé le David Cameron inné ag uimhir a deich Sráid Downing.  Bhí mé i láthair ag an ócáid sin. Ach, tá na hócáidí inniu ag tarlú taobh amuigh de Londain ach beidh spéis ar leith á chur anocht sa cheiliúradh agus san ócáid speisialta atá dírithe ar Thuaisceart Éireann, mar go mbeidh go leor de bhaill Shinn Féin i láthair, rud atá suntasach mar nach nglacann ar ndóigh na MPs as Sinn Féin a gcuid suíochán sa Pharlaimint, ach tuigimid go mbeidh go leor acu i láthair anocht ag an ócáid sin i gcaisleán Windsor.  Beidh an Bhanríon agus an Prionsa Philip é féin i láthair agus, agus beidh, beidh suim mhór á chur ansin.

ÁNC:  Sé, agus ar ndóigh ceolchoirm mór de chuid na hÉireann atá ann, cuid mhór aoíonna agus ceoltóirí speisialta as Éirinn agus é dírithe mar a déarfá ar cheol na hÉireann.

ÁNB:  Sin an ceolchoirm ceiliúrádh a bheas ar súil sa Royal Albert Hall níos moille anocht.  Tá sin ag tarlú i dtrátha ceathrú i ndiaidh a hocht, agus beidh sé beo ar RTÉ (2:00), ar an idirlíon agus tá leithéidí The Gloaming a bhfuil Iarla Ó Lionáird agus Máirtín O’Connor mar bhaill daofa ann.  Beidh Imelda May an ceoltóir as Baile Átha Cliath ann.  Beidh Dónal Lunny ann ar ndóigh a bhfuil ceangal mór aige le Rann na Feirste. Caoimhín Ó Raghallaigh agus an sárcheoltóir ar an chonsairtín, Caitlín Ní Gabhann a chaitheann go leor ama faoi Ghaoth Dobhair agus faoin taobh sin tíre, beidh siadsan ann. Agus sé Philip King ón Southwind Blows ar Raidió RTÉ atá á eagrú agus deir siad gur taispeántas a bheas ann de cheol, de fhilíocht agus de dhamhsa na hÉireann le é a chur ar stáitse do mhuintir na Breataine agus do mhuintir na hÉireann atá ina gcónaí anseo, go bhfeicfidh siad an saibhreas iontach atá ann agus ní bheidh an Bhanríon i láthair ag an ócáid sin ach beidh ionadaíocht á dhéanamh ag an Prionsa agus an Banphrionsa Michael as Kent, ag an, ag an ócáid sin.

ÁNC:  Sé. Anois, tá cuid mhór mhór poiblíochta in ag, achan eile pháipéar a Áine, a thógann tú anseo, tá pictiúirí air, tá cur síos air, tá sé in na meáin.  Cad é mar atá sé i Sasain sa Bhreatain féin?  An bhfuil mórán poiblíocht á fháil aige, bhfuil mórán daoine ag caint air, an bhfuil sé feiceálach go bhfuil a leithéid de ócáid ann?

ÁNB:  Níl sé chomh feiceálach (3:00) agus atá sé in Éirinn nó sna meáin Éireannacha ar chor ar bith, mar shampla, inné bhí níos mó aird á thabhairt ag staisiún an BBC agus Sky agus a leithéid sin do chuairt, William agus Kate Middleton go dtí an Nua-Shéalainn mar go raibh ann leanbh an Prionsa George leo.  Bhí i bhfad níos mó clúdach tugtha dó sin.  Níl sé ar phríomhleathanaigh na bpáipéar, tá sé ar leathanach deich nó leathanach dó dhéag.  Níl an oiread sin clúdach á thabhairt do, mar shampla fiú an BBC agus ITN, sé criúnna agus iriseoirí a tháinig ó Bhéal Feirste atá ag clúdach an formhór de sin.  Ar ndóigh tá na nuachtáin Éireannacha atá lonnaithe anseo i Sasain, mar shampla an Irish Post agus an Irish World ag tabhairt clúdach mór dó.  Ach i bhfírinne is iad na meáin Éireannacha atá tá ag tarraingt aird air seo.  Ag freastal ar cuid de na hócáidí ní bheadh a fhios agat go raibh cuairt mór stáit ar bun.  Níl sluaite bailithe taobh amuigh de na, de na foirgnimh agus de na hócáidí seo le fáilte a chur roimh an tUachtarán Higgins.  Tá na hÉireannaigh a bhfuil suim acu ann i láthair ach, sin é i ndáiríre.

ÁNC:  Sé.  Agus is dócha go bhfuil cuid mhór cainte fosta ar Peaches Geldof ar, ar ndóigh a fuair bás ansin agus níl a fhios acu cad é ba chúis lena bás ach tá go leor clúdach is dócha á fháil ag sin fosta.  A Áine fágfaidh muid ansin ach bain sult as do thuras agus beidh muid ag caint leat arís.

ÁNB:  Go raibh céad míle maith agat a Áine.

ÁNC:  Sin í Áine Ní Bhreisleáin ansin ó Nuacht RTÉ i Londain.