'Marbhghin 1943: Glaoch ar Liombó' le Derry O'Sullivan

‘Marbhghin 1943: Glaoch ar Liombó’ le Derry O’Sullivan

Saolaíodh id bhás thú

is cóiríodh go ghéaga gorma

ar chróchar beo do mháthar

sreang an imleacáin slán eadraibh

amhail líne ghutháin as ord.

Dúirt an sagart go rabhais ródhéanach

don uisce baiste rónaofa

a d’éirigh i Loch Bó Finne

is a ghlanadh fíréin Bheanntraí.

Gearradh uaithi thú

is filleadh thú gan ní

i bpáipéar Réalt an Deiscirt

cinnlínte faoin gCogadh Domhanda le do bhéal.

Deineadh comhrainn duit de bhosca oráistí

is mar requiem d’éist do mháthair

le casúireacht amuigh sa phasáiste

is an bhanaltra á rá léi

go raghfá gan stró go Liombó.

Amach as Ospidéal na Trócaire

d’iompair an garraíodóir faoina ascaill thú

i dtafann gadhar de shochraid

go gort neantógach

ar a dtugtar fós an Coiníneach.

Is ann a cuireadh thú

gan phaidir, gan chloch, gan chrois

i bpoll éadoimhin i dteannta

míle marbhghin gan ainm

gan de chuairteoirí chugat ach na madraí ocracha.

Inniu, daichead bliain níos faide anall,

léas i Réalt an Deiscirt

nach gcreideann diagairí a thuilleadh

gur ann do Liombó.

Ach geallaimse duit, a dheartháirín

nach bhfaca éinne dath do shúl,

nach gcreidfead choíche iontu arís:

tá Liombó ann chomh cinnte is atá loch Bó Finne

agus is ann ó shin a mhaireann do mháthair,

a smaointe amhail neantóga á dó,

gach nuachtán ina leabhar urnaí,

ag éisteacht le leanaí neamhnite

i dtafann tráthnóna na madraí.

Le caoinchead Derry O’Sullivan agus Coiscéim. Céadfhoilsíodh in Cá bhfuil do Iúdás? (Coiscéim, 1987).